Трамп украиналык качкынды өлтүргөн адамга өлүм жазасын берүүнү талап кылды

АКШнын президенти Дональд Трамп 23 жаштагы украин качкыны Ирина Заруцкаяны өлтүргөн адамга өлүм жазасын берүү керектигин билдирди.

Трамп Truth Social социалдык тармагындагы билдирүүсүндө: "Америкага тынчтык жана коопсуздук издөө үчүн келген сулуу жаш кызды мындай мыкаачылык менен өлтүргөн жаныбар... болгону өлүм жазасына тартылышы керек", — деп жазды.

Ал мындан башка чечим болбошу керектигин кошумчалады.

Ирина Заруцкая Түндүк Каролина штатындагы жеңил темир жол вагонунда өлтүрүлгөн. Анын сөөгү 22-августта Шарлотт шаарындагы Саут-Энд станциясынан табылган. Видеожазууда качкын кызга эч себепсиз артынан бычак менен кол салганы көрүнөт.

Ал эми кылмышка айыпталып 34 жаштагы Декларос Браун аттуу жаран кармалган. Ал 2011-жылдан бери 14 жолу камакка алынган.