Эне жана баланы коргоо борборуна заманбап жабдуулар тапшырылды

Улуттук эне жана баланы коргоо борборунда Rebless™ Planar инновациялык реабилитациялык жабдуусун тапшыруу аземи болуп өттү. Бул тууралуу Саламаттык сактоо министрлиги кабарлады.

Маалыматка ылайык, жабдуулар гуманитардык линия боюнча KOICA (Кореянын эл аралык кызматташтык агенттиги) жана H Robotics компаниясынын (Корея Республикасы) көмөгү менен алынып келинди. Жабдуунун наркы 150 миң доллар.

Саламаттык сактоо министри Эркин Чечейбаев Корея Өкмөтүнө, KOICAга жана H Roboticsке Кыргызстандагы медициналык реабилитацияны өнүктүрүүгө тынбай колдоо көрсөтүп жаткандыгы үчүн ыраазычылык билдирди.

"Бул жабдуу балдардын заманбап калыбына келтирүүчү дарылоого жеткиликтүүлүгүн кеңейтет жана медициналык жардамдын натыйжалуулугун жогорулатат",- деди министр.

Маалымат үчүн: Rebless™ Planar — неврологиялык жана ортопедиялык оорулардан кийинки бейтаптарда кыймыл-аракетти жана күчтү калыбына келтирүү үчүн колдонулуучу жогорку технологиялык робот-тренажёр.

Автор: Жазгүл Жаңыбаева
Фото: Саламаттык сактоо министрлиги