Украина PURL программасы боюнча Patriot ракеталарын алат

АКШ жана союздаштары тарабынан түзүлгөн жаңы PURL программасынын алкагында Украинага биринчи аскердик жардам пакеттерине Patriot жана HIMARS системалары үчүн ракеталар кирет.

Бул тууралуу Украина президенти Владимир Зеленский 17-сентябрда Киевде Европа парламентинин төрайымы Роберта Метсола менен биргелешкен басма сөз жыйынында билдирди.

Зеленскийдин айтымында, Украина PURL программасы аркылуу өнөктөштөрүнөн 2 миллиард доллардан ашуун жардам алган жана октябрь айында дагы кошумча каражат күтүлүүдө. Жалпысынан бул сумма 3–3,5 миллиард долларга жетиши мүмкүн.

Америка Кошмо Штаттарында өндүрүлгөн курал-жарактын жана ок-дарылардын ар бир пакетинин баасы 500 миллион долларды түзөт. Бул жаңы механизм аркылуу көрсөтүлгөн биринчи жардам болуп саналат.

PURL (Prioritised Ukraine Requirements List) — Украина түзгөн артыкчылыктуу муктаждыктар тизмесине ылайык, АКШ жана анын союздаштары ошол тизмеден тандалган америкалык курал-жаракты сатып алып, Украинага берет.

Мындан тышкары 16-сентябрда Reuters агенттиги АКШ президенти Дональд Трамптын администрациясы бул эки жардам пакетин бекиткенин жана алар жакын арада жөнөтүлүшү мүмкүн экенин кабарлады.

Автор: Ширин Марат кызы