Депутат парламентте Өзгөндөгү соодагерлердин көйгөйүн айтты

Жогорку Кеңештин 24-сентябрдагы жыйынында эл өкүлү Улукбек Ормонов Өзгөн районунда жайгашкан Куршаб базарындагы соодагерлердин көйгөйүн көтөрдү. Ал билдиргендей, аталган базарда ушул жылдын 11-июнунда ири өрт чыгып, 34 соодагер чыгымга учураган.

"Ушул жылдын 11-июнунда Өзгөн районунун Куршаб базарында ири өрт чыккан. Анын кесепетинен 34 соодагер жабыр тартып, чоң чыгымга дуушар болушкан. Жалпы чыгым 60 миллион сомдон ашуун. Өзүм 15-июнда окуя болгон жерде болгон элем. Бүгүнкү күнгө чейин жеңилдетилген насыя карап берүү же башка жардам маселеси чечилбей жатат",- дейт депутат.

Ормонов президенттин жана өкмөттүн парламенттеги өкүлү Алмасбек Абытовго кайрылып, министрлер кабинетинин төрагасына соодагерлердин маселесин жеткирип, чечип берүүнү суранды.