Бишкекте жигитти сабап, унаасынын айнегин талкалагандар кармалышты (видео)

Бишкекте бейбаштыкка шектелип 25 жана 39 жаштагы жарандар кармалышты. Бул тууралуу Ленин райондук ички иштер башкармалыгы билдирди.

Маалыматка ылайык, окуя 2 күн мурун, тагыраагы, 24-сентябрда саат 20:10 чамасында Садыгалиева жана Дэн Сяопин көчөлөрүнүн кесилишинде болгон. Милицияга арыз менен кайрылган жаран белгисиз адамдар денесине залал келтирип, унаасынын арткы айнегин сындырып салышканын айткан.

Аталган факт боюнча Кылмыш-жаза кодексинин 280-беренеси (Бейбаштык) менен кылмыш иши козголуп, зарыл болгон соттук-медициналык экспертизалар дайындалган.

Кармалгандар убактылуу кармоочу жайга киргизилген. Учурда тергөө иштери уланууда.