Газа тилкесине тынчтык келишиминен кийин алгачкы гуманитардык жардам жеткирилди

Кечээ, 12-октябрда ондогон жүк унаалары Керем-Шалом өткөрүү пункту аркылуу Газага гуманитардык жардам жеткире баштады. Бул жаңы ок атышууну токтотуу келишиминен кийин жардамдын көлөмүн көбөйтүүгө даярдык катары жүргүзүлүүдө. Бул тууралуу чет элдик басылмалар жазышты.

Маалым болгондой, Египет 400 жүк унаасын жөнөтүп, БУУ 170 миң тонна азык-түлүк, дары-дармек жана башка жардам даярдаган. Күн сайын Газага 600гө чейин унаа кирери күтүлүүдө.

БУУнун маалыматына ылайык, Газанын калкынын 90 пайызы орун которгон, имараттардын 83 пайызы бузулган.

Дүйнөлүк банк Газаны толук калыбына келтирүү үчүн 50 миллиард доллардан ашык каражат талап кылынарын билдирди.