Кара-Кулжа жана Алай райондорунда заманбап коомдук-маданий борборлор курулууда

Ош облусунун Кара-Кулжа жана Алай райондорунун борборлорунда мамлекеттик кызматтарды бир жерден көрсөтүүгө багытталган заманбап коомдук-маданий борборлордун курулушу жүрүп жатат. Бул тууралуу облустук өкүлчүлүктөн билдиришти.

Үч кабаттуу бул имараттарда жергиликтүү тургундар жана райондун коноктору үчүн бардык ыңгайлуу шарттар түзүлөт.

Атайын долбоордун алкагында:

— кинотеатр,

— машыгуу залы,

— банк бөлүмдөрү,

— тейлөөчү уюмдар,

— конференц-зал жана башка кызмат көрсөтүүчү жайлар каралган.

Бул ири социалдык долбоор президент Садыр Жапаровдун колдоосу менен, Ош облусунун башчысы Элчибек Жантаевдин демилгеси аркылуу ишке ашырылып жатат. Максат — тоолуу райондордун инфраструктурасын жакшыртуу, жарандар үчүн ыңгайлуу шарттарды түзүү жана жаңы жумуш орундарын ачуу.

Курулуш иштери Стабилдештирүү фондунун эсебинен каржыланууда.

Автор: Айсулуу Урустамова