Бишкекте метро курулабы же трамвай ишке киреби?

Бишкек шаарынын мэри Айбек Жунушалиев "Ала-Тоо 24" телеканалына берген маегинде шаарга метро куруу кымбатка турарын билдирди.

Ал мындай пикир борбор калаанын башкы планын иштеп жаткан адистер менен кеңешилгенде айтылганын белгиледи. Мэрдин айтымында, метронун актай турган мөөнөтү да узак болот. Андыктан адистер трамвайды ишке киргизүүнү сунуш кылышкан.

Мэр травмайлар узак жолго жүргүзүлөрүн, автобустар кыска аралыктагы каттамдарга өзгөртүлөрүн тактады. Жунушалиев шаардын башкы планы ноябрь айында коомдук талкууга чыгарын, ал бекитилген соң тийиштүү иштер жүргүзүлөрүн кошумчалады.

Айта кетсек, Бишкектеги тыгынды чечүү үчүн шаарга монорельс, метро, тез жүрүүчү жеңил поезд куруу сунуштары айтылып келет.

Автор: Кылымбек Бейшеев
Фото: Интернеттен алынды