2026-жылы 29-ZOOM видеожаңылыктар сынагы Кыргызстанда өтөт

2026-жылы 29-ZOOM видеожаңылыктар сынагы Кыргызстанда өтөт. Бул тууралуу президенттин маалымат катчысы Аскат Алагөзов билдирди.

Маалым болгондой, Алагөзов Түркиянын жаңылык операторлор ассоциациясынын төрагасы Айтэкин Полателди жана түрк маалымат каражаттарынын өкүлдөрү менен жолуккан.

Жолугушууда түрк тилдүү өлкөлөрдүн маалымат агенттиктери менен телеканалдарынын ортосундагы кызматташууну кеңейтүү, биргелешкен медиа долбоорлорду өнүктүрүү маселелери талкууланган.

"27 жылдан бери өтүп келген ZOOM эл аралык видеожаңылыктар сынагы тууралуу да пикир алмаштык. Аталган конкурс дүйнөнүн ар кыл өлкөлөрүнөн келген операторлор менен журналисттердин мыкты жаңылык видеолору бааланган ири эл аралык медиа иш-чара. Өткөн жылы ал Бакуда, быйыл Анкарада, ал эми кийинки, 29-ZOOM видеожаңылыктар сынагы Кыргызстанда өтөт", -деп жазды ал.

Алагөзов кошумчалагандай, мындай жолугушуулар жана долбоорлор түрк дүйнөсүнүн медиа тармагындагы байланышты чыңдап, кызматташууну жаңы деңгээлге чыгарууга өбөлгө болот.

Сынактын шарттары, жол-жобосу тууралуу кошумча маалымат берилет.

Автор: Ширин Марат кызы