Үгүт эрежесин бузгандар айыпка жыгылышты

Борбордук шайлоо комиссиясы шайлоо алдындагы үгүт эрежелерин бузду деген негиз менен бир катар жаранга айып пул салынганын билдирди.

Маалыматка ылайык, Facebook баракчасында шайлоо алдындагы үгүт эрежелерин бузган жана талапкерлердин кадыр-баркына доо кетирген маалыматтарды тараткан деген жүйө менен интернет колдонуучу Бакмурат Токтогулов 19 миң 500 сом айыпка жыгылган. Андан тышкары, жарандык активист Айбек Теңизбайга, журналисттер Мирлан Дүйшөнбаев менен Нургазы Анаркуловго, депутаттыкка талапкерлер Карим Ханджеза менен Канат Хасановго 7500 сомдон айып пул салынган.

Буга чейин да БШК тарабынан үгүт эрежесин бузгандарга айып салынган.

Белгилей кетсек, кезексиз парламенттик шайлоого катышуу ниетин билдирген талапкерлердин арыздары 30-октябрга чейин кабыл алынат. Ал эми шайлоо ушул жылдын 30-ноябрына белгиленген. Үгүт иштерине 10-ноябрда старт берилет.

Автор: Кылымбек Бейшеев
Фото: Интернеттен алынды