Бишкектин четинен шаарларга каттаган поезддердин убактылары өзгөрдү

Жол тыгынын азайтуу максатында Бишкектин четинен шаарларга каттаган поезддердин каттам убактылары өзгөртүлдү. Бул тууралуу "Кыргызтемиржолу" ишканасы билдирди.

Маалыматка ылайык, 10-ноябрдан тарта шаар четиндеги поезддер жаңы график боюнча жүрөт.

"Күн сайын шаар сыртынан Бишкекке жумушка же окууга каттаган жүргүнчүлөр жумуш убактысы башталганга чейин шаарга өз убагында жетип, кечки саат 18:00дөн кийин үйлөрүнө кетиши үчүн таңкы жана кечки графикке өзгөчө көңүл бурулду",- деп билдирди ишкана.

Өзгөртүлгөн график:

Кайыңдыдан Бишкекке (Эркиндик бульварындагы вокзал) поезд эртең менен саат 6:00дө чыгып, 8:20да келет;

Бишкектен Кайыңдыга саат 18:40та чыгып, 20:57де жетет;

Токмоктон Бишкекти көздөй поезд саат 6:30да чыгып, 8:35те келет;

Бишкектен Токмокко саат 18:22де чыгып, 20:28де жетет.

Автор: Бурул Турусбекова