АКШ тарыхындагы эң таасирдүү вице-президент Дик Чейни каза болду

АКШнын тарыхындагы эң таасирдүү вице-президент Дик Чейни 84 жашында каза болду.

Саясатчынын өлүмү тууралуу CNN телеканалы анын үй-бүлөсүнө таянып кабарлады. Телеканал Чейнини "терроризм менен күрөшүү согушунун" башкы архитектору деп атап, анын америкалык аскерлердин Иракта согушка катышуусуна себепчи болгонун белгиледи.

Чейни көп жылдар бою жүрөк-кан тамыр ооруларынан жабыркап, бир нече жолу инфаркт болгон. 2012-жылы анын жүрөгүн алмаштырышкан.

Дик Чейни АКШнын төрт президентинин администрациясында иштеген. 1989-жылдын 20-мартында президент Жорж Буш-улуусу аны коргоо министри кылып дайындаган. АКШнын вице-президенти болуп Чейни 2001-жылы шайланган.

CNN белгилегендей, акыркы жылдары Чейни Республикалык партия тарабынан четке кагылган, анткени учурдагы президент Дональд Трампты кескин сындап, аны "коркок" жана "өлкөгө эң чоң коркунуч" деп атаган.

Автор: Ширин Марат кызы