Ош облустар аралык ооруканасында жаңы перинаталдык борбордун курулушу башталды

Бүгүн, 20-ноябрда Ош облустар аралык бириккен клиникалык ооруканасынын аймагында курула турган жаңы перинаталдык борбордун пайдубалына мезгил капсуласын салуу аземи өттү. Бул тууралуу облустук өкүлчүлүктөн билдиришти.

Иш-чарага облус башчысы Элчибек Жантаев, Германиянын Кыргызстандагы элчиси Моника Ленхард, саламаттык сактоо министринин биринчи орун басары жана медициналык кызматкерлер катышты.

Жаңы перинаталдык борбор 2 кабаттан туруп, 249 орунга ылайыкташтырылмакчы. Блоктун түзүлүшү төмөнкүдөй болот:

1-кабат: кабыл алуу бөлүмү, операция жасоо залдары жана төрөт бөлмөлөрү
2-кабат: аялдар үчүн интенсивдүү терапия бөлүмү, неонаталдык кароо (интенсивдүү терапиядан чыгарылган ымыркайлар үчүн) жана ымыркайлар бөлүмдөрү

Белгилей кетсек, долбоор Германиянын өнүктүрүү банкы аркылуу Германиянын каржылык колдоосу менен ишке ашууда.

Автор: Айсулуу Урустамова