Коопсуздук эрежелерин бузган компанияга айып салынып, 10 күн убакыт берилди (видео)

28-ноябрда Бишкек шаарынын Элебаев көчөсү, 48 дарегинде жайгашкан курулуш объектисинде коопсуздук техникалык эрежелери сакталбай жаткандыгы тууралуу жашоочулардан видео кайрылуу келип түшкөн. Бул тууралуу Курулуш министрлигинен билдиришти.

Курулуш министрилигине караштуу Мамлекеттик архитектура-курулуш контролдоо департаментинин Бишкек шаардык башкармалыгы тарабынан көрсөтүлгөн дарек боюнча ыкчам аракеттер көрүлдү. Аталган курулуш объектисиндеги иштерден улам жанаша жайгашкан аймакка кооптуу абал жаралып, техникалык коопсуздук эрежелери сакталбагандыгы маалым болду.

Натыйжада курулуш иштерин жүргүзүп жаткан “Курулуш” ЖЧКсына карата акт түзүлүп, 200 000 сом өлчөмүндө айып салынды. Ошондой эле кемчиликтерди жоюу үчүн 10 күн убакыт берилип, курулушу убактылуу токтотулду. Мындан сырткары курулуш компаниясынын лицензиясын токтотуу маселеси атайын түзүлгөн комиссиянын отурумунда каралат.