"42 миллион адам жашайт". Жакарта дүйнөдөгү эң калктуу шаарга айланды

Индонезиянын борбору Жакарта БУУнун докладына ылайык, дүйнөдөгү эң калктуу шаар болуп, Токиодон озуп кетти. Азыр шаарда 42 миллион адам жашайт. Экинчи орунда — Бангладештин борбору Дакка, анда 36,5 миллион киши жашайт.

2018-жылы жашоочулары эң көп деп эсептелген Токио шаары азыр үчүнчү орунга түшүп калды. Бул мегаполисте 33 миллион тургун бар.

Алдыңкы ондукка ошондой эле Нью-Дели, Шанхай, Гуанчжоу, Манила, Калькутта жана Сеул кирди. Рейтингдеги Азиядан тышкаркы жалгыз шаар — Египеттин борбору Каир, анда 25,5 миллионго жакын адам жашайт.

Москва 14,5 миллион калкы менен 19-орунду ээледи. Андан жогору орунда 15 миллион калкы менен Стамбул жайгашты.

Автор: Ширин Марат кызы