Шайлоо-2025: Шайлоо участкаларына алгачкы добуш берүүчүлөр келүүдө (видео)

Бүгүн, 30-ноябрь өлкө боюнча шайлоо участкалары ачылып, алгачкы добуш берүүчүлөр келүүдө.

Бишкек шаарындагы №1002 шайлоо тилкесинде дагы добуш берүүчүлөрдү кабыл алуу жүрүп жатат. Аталган шайлоо тилкесинин төрагасы Адил Молдоев шайлоочулар активдүү катышып жатканын билдирди.

"Учурда 30га жакын киши шайлоодон өттү. Аймактардагы шайлоочулар дагы келүүдө. Бул жакта Өзгөчө кырдаалдар министрлигинин кызматкерлери, коопсуздукту камсыз кылуу органдарынын кызматкерлери жана байкоочу топ шайлоого көзөмөл жүргүзүүдө", - дейт ал.

Өлкө аймагы боюнча 2492, ал эми чет мамлекеттерде 100 шайлоо тилкеси ачылды. Ошондой эле 27 аралыктан добуш берүү тилкеси иштеп жатат. Учурда жалпы 461 талапкер ат салышууда. Кыргызстанда 30 шайлоо округу түзүлгөн. Шайлоочулар талапкерлердин бирөөсүнө гана добуш бере алат. Ал эми ар бир округдан үчтөн депутат шайланып келет. Жалпысынан парламент 90 депутаттан турат.

Шайлоо участкалары жергиликтүү убакыт боюнча саат 20:00гө чейин иштейт.