Ош шаарында жаңы жылдык майрамга карата даярдык кызуу жүрүүдө

Ош шаарындагы жаңы жылдык балатыны жасалгалоого 3 миллион сомдун тегерегинде каражат бөлүндү. Бул тууралуу шаардык Маданият башкармалыгынан билдиришти.

Берилген маалыматка ылайык, аянтты жасалгалоо жумуштарын Бишкектин “Северное сияние” компаниясы жүргүзүүдө.

“Балатыны 15-декабрга чейин жандыруу пландалган. Учурда иштердин 90 пайызы бүттү. Жалпы жасалгалоого 3 миллион сомго жакын акча жумшалды. Аянтта эми муз тебүүчү аянтча, кичинекей үйлөр, кошумча балатылар жана чоң LED-экран орнотулууда”, — деп билдиришти башкармалыктан.

Шаар тургундары жана коноктор жаңы жылдык майрамдык атмосфераны ушул айдын ортосунан баштап көрө алышат.

Автор: Меерим Кабылова