Зеленский шайлоо маалында ок атууну токтотууну сунуштады

Украина президенти Владимир Зеленский АКШ талап кылып жаткан президенттик шайлоо өтүп турган убакта ок атышууну токтотуу режимин киргизүүнү сунуштады. Бул тууралуу ал 11-декабрда "каалоочулардын коалициясы" аттуу онлайн-жыйында сүйлөп жатып айтканын чет элдик басылмалар жазышууда.

"Биз АКШнын президенти Дональд Трамп менен каалаган форматта иштөөгө даярбыз. Эгер президент Трамп Украинадагы шайлоолор жөнүндө көбүрөөк айтып жатса, мен айткым келет: мүмкүнчүлүк бар жерде биз шайлоо өткөрүүгө аракет кылсак болот. Украина демократиядан качпайт",- деди Зеленский.

Ал шайлоолор коопсуздук камсыздалганда гана мүмкүн болорун белгилеп, мында Америка чоң жардам бере ала тургандыгын белгиледи.

Айта кетсек, Дональд Трамп 9-декабрда Politico басылмасына берген маегинде "Украинада президенттик шайлоо өткөрүүгө убакыт келди" деп билдирген. Зеленский да ошол эле күнү АКШ жана Европа коопсуздукту камсыздап берсе, 60-90 күндүн ичинде шайлоо өткөрүүгө даяр экенин айткан.

Автор: Замира Ниязбекова