Элдар Абакиров Башкы прокуратура жана УКМКга кайрыларын билдирди

Жогорку Сот Жогорку Кеңештин депутаттыгына №26 шайлоо округунан талапкер болгон Элдар Абакировдун арызын канааттандырган жок.

Абакиров Facebook баракчасында кайрылуу жасап, тиешелүү документтерди тиркөө аркылуу Башкы прокуратура жана УКМКга кат жазарын билдирди. Ал укугун мыйзам чегинде коргоону улантарын кошумчалады.

Эске салсак, 12-декабрда Бишкектин административдик соту Абакировдун Борбордук шайлоо комиссиясынын чечимине каршы жазган арызын канааттандырган эмес.

Абакиров шайлоодон кийин кайрылуу жасап, БШКга арыз жазган. Ал өзү катышкан округда мыйзам бузуулар болгонун айтып, шайлоонун жыйынтыгын жокко чыгарууну сунуштаган.

ИИМ акча тараткан адам талапкер Медербек Саккараевдин өкүлү экенин ырастап, текшерүү иши жүрүп жатканын билдирген. БШК 8-декабрдагы отурумунда акча таратууга талапкердин тиешеси жоктугу айтылып, Жогорку Кеңештин VII чакырылышынын депутатынын арызы канааттандырылган эмес.

Автор: Кылымбек Бейшеев
Фото: Интернеттен алынды