Кыргыз-Ооган бизнес форумунда 157 миллион долларлык 11 келишим түзүлдү

Ооганстандын борбору Кабул шаарында Кыргыз-Ооган бизнес форуму болуп өттү. Бул тууралуу 18-декабрда Экономика министрлигинин басма сөз кызматы билдирди.

Маалыматка ылайык, форумдун жүрүшүндө ооган бизнес-коомчулугуна Кыргызстандын экспорттук мүмкүнчүлүктөрү тууралуу маалымат берилди.

Иш-чаранын жыйынтыгында товарларды жеткирүү жана кызмат көрсөтүү боюнча жалпы суммасы 157 миллион АКШ долларын түзгөн 11 келишимге кол коюлду. Бул келишимдер телекоммуникациялык жабдуулар, цемент, бут кийим, дары-дармектер, бал, логистикалык кызматтар жана айыл чарба продукциясы сыяктуу багыттарды камтыйт.

Бизнес-форумга эки өлкөнүн мамлекеттик органдарынын жана бизнес чөйрөлөрүнүн 100дөн ашуун өкүлү катышты.

Автор: Меерим Кабылова
Фото: Экономика министрлиги