Бишкекте 200 миң сомдук идиш-аяк уурдоого шектелгендер кармалышты

Бишкек шаарынын ички иштер башкармалыгынын кызматкерлери автоунаадан уурулук кылууга шектелген эки жаранды кармашты. Бул тууралуу 18-декабрда мекеменин басма сөз кызматы билдирди.

Маалыматка ылайык, окуя 26-октябрда Шопоков көчөсүндө болгон. Белгисиз адамдар Honda Fit унаасынан 200 миң сомдук идиш-аяктарды уурдап кетишкен.

Аталган факт боюнча Кылмыш-жаза кодексинин 205-беренеси (уурулук) менен кылмыш иши козголуп, шектүүлөр 1995-жылы туулган Т. Т. жана 1997-жылы туулган Б. У. кармалып, убактылуу кармоочу жайга киргизилди.

Учурда тергөө иштери жүрүп жатат.

Автор: Меерим Кабылова