Оренбург облусундагы жол кырсыгында үч кыргызстандык каза болду

Кечээ, 23-декабрда Орусиянын Оренбург облусунда жол-транспорт кырсыгынан улам Кыргызстандын үч жараны каза болду. Бул тууралуу Тышкы иштер министрлиги билдирди.

Маалым болгондой, каза болгондор 1977-жылы туулган Ж.Ж., 1997-жылы туулган Э.А. жана 2023-жылы туулган наристе. Андан тышкары эки кыргыз жараны оор жаракат алып, жергиликтүү медициналык мекемелерге жаткырылды.

Кыргызстандын Орусиядагы элчилиги каза болгон жана жабыркагандардын туугандары менен байланыш түзүп, консулдук-укуктук жардам көрсөтүү иштерин жүргүзүүдө. Азыр каза болгондордун сөөгүн мекенине жеткирүү маселеси каралууда.

Министрлик Орусияга жолго чыгууну пландап жаткан кыргызстандыктарга аба ырайын эске алууга чакырат.

Автор: Замира Ниязбекова