Жолдошунун колунан каза тапкан аялдын балдарына психологиялык жардам көрсөтүлөт

Бишкек шаарында мурунку жолдошу атып өлтүргөн аялдын балдарына жана туугандарына психологиялык жардам көрсөтүлөт. Бул тууралуу Акыйкатчы институту кабарлады.

Акыйкатчы Жамиля Жаманбаева аталган окуяны трагедия катары баалап, укук коргоо органдарын үй-бүлөлүк зомбулук боюнча кайрылууларга ыкчам чара көрүүгө чакырган.

"Өзүнүн туулган күнүндө үч баланын энеси атып өлтүрүлдү. Бул кайгылуу окуя биздин өлкөдө аялдар менен кыз-келиндер бүгүнкү күнгө чейин жетиштүү деңгээлде коргоого алынбай жатканын дагы бир жолу далилдеди. Алар тиран күйөөлөрүнөн убагында кете албай калышууда. Кылмышка күнөөлүүлөр мыйзам боюнча катаал жазасын алышы керек",- деген Жаманбаева өз сөзүндө.

Институттун маалыматына караганда, каза болгон аял 2025-жылдын ноябрь айында үй-бүлөлүк зомбулук боюнча укук коргоо органдарына арыз жазган. Маркум ажырашуу боюнча сотко дагы кайрылган.

Айта кетсек, 23-декабрда саат 21:40 чамасында Бөкөнбаев көчөсүндөгү батирлердин биринде каргашалуу окуя катталды.

Автор: Бурул Турусбекова