Мексикада поезд кырсыгынан 13 адам каза болуп, 98 киши жаракат алды (видео)

Мексиканын Охака штатындагы Нисанда калктуу конушунун жанында 28-декабрда поезд рельстен чыгып, кырсыкка кабылды. Бул тууралуу чет элдик басылмалара жазып чыгышты.

"Аскер-деңиз күчтөрүнүн министри поезд кырсыгынан улам 13 адам каза болуп, 98 киши жаракат алганын, алардын бешөөсүнүн абалы оор экенин маалымдады",- деп жазды өлкө президенти Клаудия Шейнбум X социалдык тармагына.

Жабыркагандар Матиас-Ромеро, Салина-Крус, Хучитан жана Икстепак шаарларындагы медициналык мекемелерге жеткирилишти.

Поездде жалпысынан 241 жүргүнчү жана 9 экипаж мүчөсү болгон.

Окуя болгон жерге Аскер-деңиз күчтөрүнүн министри Раймундо Педро Моралес Анхелес жөнөтүлүп, кырсыктын себептери иликтенүүдө.