Борбордук Африка Республикасында жалпы шайлоо өттү

Борбордук Африка Республикасында президенттик, парламенттик, аймактык жана муниципалдык деңгээлдеги жалпы шайлоолор болуп өттү. Бул тууралуу чет элдик басылмалар жазышты.

Маалыматтарга караганда, шайлоодо азыркы мамлекет башчысы Фостен-Арканж Туадера алдыда келе жатат. Ал 2016-жылдан бери өлкө президенти болуп иштеп келет жана бул жолу үчүнчү мөөнөткө талапкерлигин койгон.

Президенттикке оппозиция өкүлдөрү Анисе-Жорж Дологуэле жана Анри-Мари Дондра да ат салышууда. Дологуэле буга чейин 1999–2001-жылдары, ал эми Дондра 2021–2022-жылдары премьер-министр кызматын аркалаган. Серепчилердин баамында, Туадеранын негизги атаандашы катары Дологуэле көрсөтүлүүдө.

Өлкөдө жалпы 5,5 миллион калк жашаса, алардын болжол менен 2,4 миллиону добуш берүү укугуна ээ.

Өлкөдөгү кырдаал 2013-жылдан бери өкмөттүк күчтөр менен куралдуу топтордун ортосундагы жаңжалдардан улам курч бойдон калууда. Буга байланыштуу президент Туадера шайлоо алдында жарандарды туруктуулукка жана мамлекеттик институттарды бекемдөөгө чакырган.

Автор: Максуда Кудайбердиева