2026-жылдан тартып Грузияга кирүү эрежелери өзгөрөт: Кыргызстандын жарандары эмнени билиши керек?

Тышкы иштер министрлиги Грузия өкмөтү тарабынан чет өлкөлүк жарандар үчүн киргизилген жаңы талаптар тууралуу расмий маалымат таратты. Жаңы эрежелер 2026-жылдын 1-январынан тартып күчүнө кирет жана Грузияга барууну пландап жаткан бардык чет өлкөлүк жарандарга, анын ичинде Кыргызстандын жарандарына тиешелүү болот.

Жаңы талаптын маңызы эмнеде?

Маалыматка ылайык, 2026-жылдан тартып Грузияга кирген ар бир чет өлкөлүк жаран өлкөдө болгон бардык мезгилге жарактуу медициналык жана кырсыктан камсыздандыруу полисине ээ болушу шарт.

Бул талап Грузиянын туризм тармагындагы мыйзамдарынын алкагында киргизилген жана төмөнкү максаттардагы сапарлардын бардыгына тиешелүү:

туристтик;
ишкердик;
жеке (конокко баруу, туугандарга жолугуу ж.б.).

Камсыздандыруу полисине коюлган талаптар

Камсыздандыруу полиси төмөнкү шарттарга жооп бериши керек:

Камсыздандыруу Грузиянын же чет өлкөлүк камсыздандыруу компаниясынан алынган болушу мүмкүн;
Документ грузин же англис тилинде көрсөтүлүүгө тийиш;
Кагаз түрүндө же электрондук форматта кабыл алынат;

Камсыздандыруу суммасы кеминде 30 000 грузин ларисин (GEL) түзүшү зарыл.

Полисте милдеттүү түрдө көрсөтүлө турган маалыматтар

Камсыздандыруу полисинде төмөнкү маалыматтар камтылышы шарт:

келишимдин тараптары;
камсыздандыруунун колдонуу аймагы жана максаты;
полистин күчүнө кирүү жана аяктоо мөөнөтү;
камсыздандыруу тобокелдиктери жана төлөмдүн суммасы;
кошумча акынын өлчөмү, төлөө шарттары жана орду.

Кыргызстандын жарандарына сунуштар

Тышкы иштер министрлиги Грузияга сапарды пландап жаткан Кыргыз Республикасынын жарандарына төмөнкүлөрдү эске алууну сунуштайт:

жаңы кирүү эрежелери менен алдын ала таанышуу;
авиакомпаниялардын жана чек ара кызматтарынын кошумча талаптарын тактоо;
сапарга чыгардан мурда медициналык камсыздандырууну тариздеп, анын кагаз түрүндөгү көчүрмөсүн кошо алып жүрүү.

Кошумча документтер да талап кылынат

Миграциялык мыйзамдардын жалпы талаптарына ылайык, Грузияга кирүүдө төмөнкү документтер да болушу зарыл:

жарактуу паспорт;
кайтып келүү билети;
жашай турган жерди тастыктаган документ (мейманкана брондоосу ж.б.).

Маанилүү эскертүү

Тышкы иштер министрлиги бул маалымат түшүндүрмө мүнөзүндө берилгенин жана бардык талаптар аткарылган күндө да Грузияга кирүүгө толук кепилдик бербесин эскертет. Акыркы чечим чек ара кызматтары тарабынан кабыл алынат.

Автор: Максуда Кудайбердиева