Жогорку Кеңештин депутаты Жылдыз Таалайбек кызы атасынын мүлкүнөн баш тарткандыгын айтты

Жогорку Кеңештин депутаты Жылдыз Таалайбек кызы атасы каза болгондон кийин мурастан расмий түрдө баш тартканын жергиликтүү басылмаларга билдирди.

Депутаттын айтымында, ата-энесинин мүлкүнө доо койбогонун жана жашоосун, эмгек жолун өз алдынча курууну бала кезинен эле чечкенин белгилеген.

"Биз кандай үй-бүлөдө төрөлөрүбүздү тандабайбыз. Ата-эненики балага жукпайт, буюрбайт. Атамдын көзү өткөндөн кийин мурастан баш тарткам. Анткени менин ага тиешем жок. Кичинекей кезимден бардыгына өз күчүм менен жетем, силерден эч нерсе кереги жок деп айтчумун", - деди депутат.

Буга чейин коомчулукта Жылдыз Таалайбек кызына айрым объектилер – "Сүмбүл" мончосу, "Кристалис" комплекси жана "Архар" эс алуу жайы тиешелүү болушу мүмкүн деген божомолдор айтылган. Бирок депутат басылмага бул маалыматтарды четке кагып, аталган объектилердин ээси эместигин баса белгилеген.

Автор: Айзада Кыдырмышева