Улуттук кардиология борборунун директору эки жылда 45 жолу чет өлкөгө чыккан

Улуттук кардиология жана терапия борборунун директору акыркы эки жылда 45 жолу, башкача айтканда, ай сайын 2 ирет чет өлкөгө чыгып турган. Бул тууралуу бүгүн, 13-январда Саламаттык сактоо министринин басма сөз кызматы билдирди.

Маалым болгондой, Улуттук кардиология жана терапия борборунда жүрөк-кан тамыр оорулары менен ооругандарга шашылыш медициналык жардам көрсөтүүнү уюштурууда бир катар олуттуу мыйзам бузуулар аныкталып, министр Каныбек Досмамбетов Миррахимов атындагы аталган ооруканада жыйын өткөрдү.

Анда дары-дармектерди жана медициналык жабдууларды сатып алуудагы коррупциялык көрүнүштөргө жана борбордун директору Талантбек Сооронбаевдин жеке жоопкерчилигине көңүл бурду. Болжол менен 2 миллион долларга бааланган мүлк боюнча суроолор берилди.

Жыйынтыгында өз арызы менен аталган оорукананын директору жумуштан кетти.

Автор: Замира Ниязбекова