"Сынган кылыч" чыгармасы боюнча тасма тартуу пландалууда (видео)

Кыргыз эл жазуучусу Төлөгөн Касымбековдун "Сынган кылыч" чыгармасынын негизинде тасма тартылат. Бул тууралуу маданият министринин орун басары Марат Тагаев 19-январдагы парламенттин Илим, билим берүү, инновациялык өнүгүү жана маалыматтык технологиялар, маданият комитетинин жыйынында билдирди.

Айтымында, тасма тартуу иштерине 2020-жылдары 100 миллион сомго чейин каражат бөлүнсө, азыр бул сумма 1 миллиард сомго чейин жеткен.

"10 жыл мурда "Курманжан датка" тарыхый тасмасы тартылган. Андан бери тарыхый тасма деле тартыла элек. "Сынган кылычты" тартуу боюнча Улуттук кеңештин чечими чыккан. 2026-жылы анын сценарийин иштеп чыгуу жана сметасы бекитилген. Ал сценарийди жазуу Султан Раевге берилди.

Ушул жылдын аягы, 2027-жылдын башында тасма тартуу иштерин баштоону пландап турабыз",- деди Тагаев.

Ал кошумчалагандай, келерки жылдары дагы тарыхый тасмаларды тартуу мерчемделүүдө.

"Ири тарыхый тасмаларды тартуу үчүн кинопавильон абдан маанилүү. Ансыз тасмаларды тартуу мүмкүн эмес. Ошон үчүн 2026-жылы кинопавильонду куруп баштап, 2027-жылы бүтүрсөк. Бул жерде ири тарыхый тасмалар тартылат",- дейт орун басар.