Сокулукта өз энесин сабап келген делип 47 жаштагы жаран кармалды

Сокулукта өз энесин кыйноого алган деген шек менен 47 жаштагы жаран кармалды. Бул тууралуу бүгүн, 22-январда Чүй облустук ички иштер башкармалыгы билдирди.

Маалыматка ылайык, 3-январда милицияга кайрылган 67 жаштагы жаран өз уулу мас болгондо системдүү түрдө физикалык жана психологиялык зомбулук көрсөтүп келгенин айткан.

Факт боюнча Кылмыш-жаза кодексинин 138-беренеси (Кыйноо) менен кылмыш иши козголуп, жабырлануучуга соттук-медициналык экспертиза дайындалган. Шектүү убактылуу кармоочу жайга киргизилген.

Учурда кылмыш ишин ар тараптуу жана объективдүү иликтөөгө багытталган зарыл болгон тергөө иштери жүргүзүлүүдө.

Автор: Кылымбек Бейшеев
Фото: Чүй ОИИБ