Бишкекте 18, 17 жаштагы уландар опузалап акча талап кылууга шектелип кармалышты

Бишкекте 18 жаштагы эки, 17 жаштагы үч жигит опузалап акча талап кылууга шектелип кармалды. Бул тууралуу бүгүн, 27-январда Ички иштер министрлиги билдирди.

Маалыматка ылайык, 17-январда милицияга кайрылган жаран өткөн жылдын 18-декабрында 17 жаштагы уулун коркутуп, "баңгизаттарды таратып жүрөсүң" деген айыптоо менен видеого тартып алышып, анан 400 миң сом акча талап кылгандарга чара көрүүнү суранган.

Аталган факт боюнча Кылмыш-жаза кодексинин 208-беренеси (Опузалап талап кылуу) менен кылмыш иши козголгон. Натыйжада, шектүүлөр 400 миң сомду алып жаткан жеринен колго түшүшкөн. Учурда тергөө иштери уланууда.

Автор: Меерим Кабылова