Бишкек мэриясы Ак-Жар жана Ак-Бата конуштарындагы мектеп маселеси боюнча маалымат берди

Жогорку Кеңештин депутаты Улукбек Карыбек уулу Бишкек шаарынын Свердлов району боюнча пландалган иш-чаралар тууралуу расмий маалымат сураган. Ага жооп катары Бишкек шаарынын мэриясы бардык зарыл маалыматтарды толук көлөмдө жөнөткөнүн билдирди.

Маалыматка ылайык, кечээ, 26-январь күнү парламент жыйынында депутат Ак-Жар жаңы конушунда 15 миңге жакын адам жашап, балдары билим алуу үчүн шаарга каттап жүргөнүн айтып, мэриянын жообуна күмөн санаганын билдирген.

Мэриянын маалыматына ылайык, Ак-Бата конушунда 620 орундуу мектеп курулуп, пайдаланууга берилген. Учурда анда 1 миң 735 окуучу билим алууда, сабактар эки нөөмөттө өтүүдө.

Ошондой эле Ак-Жар конушу мыйзамсыз жер басып алуу жолу менен пайда болгондуктан, азырынча мектеп курууга бош жер жок экени белгиленди. Бул маселе шаар мэри Айбек Жунушалиевдин тургундар менен болгон жолугушуусунда да талкууланган.

Автор: Айзада Кыдырмышева