№13 округда шайлоо: БШК алгачкы 5 талапкерди каттады

Борбордук шайлоо комиссиясы бүгүн, 29-январда №13 көп мандаттуу шайлоо округу боюнча Жогорку Кеңештин депутаттыгына төмөнкү талапкерлерди каттоо боюнча чечим кабыл алды.

Базарбаев Каныбек Сүйүнүчбекович;
Койчуманова Нуркан Кадыровна;
Мацаков Бакыт Калбаевич;
Нуриев Кубан Бактыбаевич;
Чомоев Алмазбек Алтынбекович.

Аталган талапкерлердин шайлоо документтери жумушчу топ тарабынан Жогорку Кеңештин депутаттыгына талапкерлерге коюлуучу мыйзамдардын талаптарына ылайык келери аныкталган жана аларды каттоо сунушталган.

БШК билдиргендей, катталган талапкерлерге белгиленген үлгүдөгү ырастамалар берилет.

Маалымат үчүн: БШК Жалал-Абад облусунун №13 округундагы шайлоонун жыйынтыгын жокко чыгарган. Мекеме аталган округда шайлоо бир ай ичинде кайра дайындаларын, мурдагы 14 талапкер кайра катыша албастыгын билдирген. Шайлоого талапкерлердин документтери 29-январга чейин кабыл алынат. Ал эми шайлоо ушул жылдын 1-мартында өтөт.

№13 шайлоо округу Масы айылы. Шайлоочулардын саны 159 миң 906. Шайлоо округуна Базар-Коргон шаарындагы №2423, 2428, 2140, 2141 шайлоо тилкелери, Кеңеш, Арстанбап-Ата, Сайдыкум айыл аймактары кирди.

Автор: Айжанар Рыспек кызы
Фото: интернеттен алынды