Имандос Бектенов ок атуу спорту боюнча Азия чемпиондугунда күмүш медаль утту

Кыргыз Республикасынын ок атуу спорту боюнча улуттук курама командасынын мүчөсү Имандос Бектенов Азия чемпиондугунда күмүш медаль жеңди. Бул тууралуу Дене тарбия жана спорт мамлекеттик агенттигинен билдиришти.

Маалыматка ылайык, 2-14-февраль күндөрү Индиянын Нью-Дели шаарында ок атуу спорту боюнча Азия чемпиондугу өтүп жатат. Мелдешке Азиянын 19 өлкөсүнөн жалпы 385 спортчу катышууда. Чемпиондуктун программасына үч жаш курактык категория кирет.

Кыргызстандын курама командасынан 16 спортчу 3 машыктыруучунун жетекчилиги алдында мелдешке катышууда.

Мелдештин биринчи күнүнүн жыйынтыгында 10 метр аралыкка Air Pistol (пневматикалык тапанча) менен атуу көнүгүүсүндө Кыргызстандын эки спортчусу финалга чыкты. Чоңдор арасында Аскат Токмоков 7-орунду ээлесе, юниорлор арасында Имандос Бектенов 2-орунду камсыздап, күмүш медалга ээ болду.

Автор: Айзада Кыдырмышева