Дүйнөлүк көчмөндөр оюндарына 100дөй өлкөнүн спортчулары катышат

Өлкөдө өтө турган Дүйнөлүк көчмөндөр оюндарына 100дөн кем эмес мамлекеттен спортчулар жана меймандар катышары күтүлүүдө. Бул тууралуу министрлер кабинетинин төрагасынын орун басары Бакыт Төрөбаев Чолпон-Ата шаарындагы ипподромдо өткөн көчмө жыйында билдирди.

Төрөбаев жетектеген Айыл чарба министрлиги кабарлагандай, жыйындын жүрүшүндө дүйнөлүк масштабдагы бул маданий-спорттук иш-чарага даярдык көрүү маселелери талкууланып, уюштуруу иштеринин жүрүшү, инфраструктуралык объекттердин абалы жана эл аралык конокторду кабыл алуу шарттары каралган.

Иш сапардын алкагында Бакыт Төрөбаев Чолпон-Ата шаарындагы ипподромдун учурдагы абалы менен таанышып чыгып, тиешелүү тапшырмаларды берген.

Эске салсак, Дүйнөлүк көчмөндөр оюндары быйыл 31-августунан 6-сентябрына чейин өтөт.

Автор: Кылымбек Бейшеев
Фото: Интернеттен алынды