Таласта жубайын өрттөгөнгө аракет кылган делип кармалган жаран мэрияда иштейби?

Акыйкатчы институту жубайына зомбулук көсөтүүгө шектелип кармалган 31 жаштагы жаран Талас шаардык мериясында иштээрин кабарлады.

Талас шаардык мэриясы маалыматты төгүндөп, ал мурда иштегенин, учурда мэриянын кызматкери эместигин билдирди.

"Ал 2025-жылдын 15-июлунан 22-декабрына чейин мэриянын алдындагы "Жашыл чарба" муниципалдык ишканасында эмгектенген", - деп айтылат маалыматта.

Эске салсак, шектүү 2 күн мурун, тагыраагы, 6-февралда кармалган. Анын үстүнөн 5-февралда 27 жаштагы жубайы арыз жазып, жашырып келген окуяны ачыктаган. Өткөн жылдын 15-октябрында шектүү Таластын Бакай-Ата районундагы үйүндө жубайынын башынан ылдый күйүүчү май куюп, өрт койгон. Бактыга жараша келин аман калып, дарыланып чыккан.

Факт боюнча Кылмыш-жаза кодексинин 130-беренесинин 2-бөлүгүнүн 1-пункту (Ден соолукка оор залал келтирүү) менен кылмыш иши козголгон.

Автор: Кылымбек Бейшеев