Транспорт министрлиги ашуулардагы абал боюнча маалымат берди

Бүгүн, 12-февралга карата көпчүлүк аймактарда кар жаап, жол тазалоо иштери тынымсыз жүрүүдө. Бул тууралуу Транспорт жана коммуникациялар министрлигинин маалымат кызматы кабарлайт.

Ага ылайык, азыркы тапта өлкөнүн ашууларында кар майдалап жаап жатат. Тайгак тилкелерге инерттик материалдар себилип, тазалоо иштери жүрүүдө.

Бишкек - Ош унаа жолундагы Төө-Ашуу жана Ала-Бел, Суусамыр - Талас - Тараз жолундагы Өтмөк ашуусунда оор жүк ташуучу унаалар үчүн чектөө күчүндө калууда.

Транспорт министрлиги айдоочуларды каршы тилкеге чыкпай, жол эрежесин так сактоого чакырат.

Автор: Айжанар Рыспек кызы