Чүйдө баңгизат сатууга шектелип 19 жаштагы жигит кармалды

Чүйдө мыйзамсыз баңги каражаттарын сатууга шектелген жаран кармалды. Бул тууралуу Чүй ОИИББинин басма сөз кызматы билдирди.

Маалыматка ылайык, Ысык-Ата райондук милициясына Ново-Покровка айылындагы үйлөрдүн биринде баңги каражаттары сакталууда деген маалымат түшкөн. Бул факт каттоого алынып, окуя болгон жерге ыкчам-тергөө тобу дароо жөнөтүлгөн.

Ыкчам-тергөө иш-чараларынын жүрүшүндө аталган үйдөн шек жараткан 19 жаштагы К.Б. аттуу жаш жигит кармалган. Жеке тинтүү учурунда анын жанынан өзгөчө жыты бар, белгисиз нерсе табылган. Факт боюнча Кылмыш жаза кодексинин 282-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча кылмыш иши козголду.

Учурда тергөө уланууда.

Автор: Бурул Турусбекова