16 жылдан бери издөөдө жүргөн жаран Олимпиададан кармалды

2010-жылдан бери издөөдө жүргөн Словакиянын жараны Италияда өтүп жаткан кышкы Олимпиадада кармалды. Бул тууралуу чет элдик басылмалар жазышты.

Андагы маалыматка ылайык, 44 жаштагы жаран шейшембиде Словакия менен Финляндиянын хоккей боюнча олимпиадалык турнирине келгенде колго түшкөн.

16 жыл мурда италиялык прокурорлор тарабынан дүкөндөрдө уурулук иштерине байланыштуу ага камакка алуу ордери чыгарылып, ал сыртынан 11 ай жети күнгө эркинен ажыратылган.

Полиция кызматы шектүүнү аңдып, Миландын четиндеги конок үйүнө кирген учурда кармаган. Укук коргоо органдары аны "Сан-Витторе" борбордук абагына алып кетишкен.