Чолпон-Атада УКТ мүчөсүнүн үйүнөн курал-жарактар табылды

Чолпон-Ата шаарынын 39 жаштагы тургунунун үйүнөн курал-жарактар табылды. Бул тууралуу Ысык-Көл облустук милициясы билдирди.

Маалымдалгандай, ал ИИМде уюшкан кылмыштуу топтун мүчөсү катары каттоодо турат. Анын турак жайынан төмөнкү буюмдар табылган:

HATSAN 125 үлгүсүндөгү 4,5 миллиметр калибрлүү оптикасы бар пневматикалык курал;
Узундугу болжол менен 30-35 сантиметр болгон жыгач саптуу канжар;
3 даана заводдук аңчылык бычак (кыны менен), узундугу болжол менен 20-25 сантиметр;
2 даана заводдук бүктөлмө маки;
Тиешелүү документтери жок ак түстөгү SEADOO FLI 373 KD үлгүсүндөгү 2 тактылуу моторлуу катер;
Болжол менен эликтин мүйүзү;
4 даана балык уулоочу кайырмак;
2 даана балык салуучу түйүлгөн баштыкча.

Аталган бардык буюмдар далил зат катары алынып, тиешелүү соттук экспертизалар дайындалган. Учурда тергөө иштери уланууда.

Автор: Кылымбек Бейшеев
Фото: Ысык-Көл ОИИБ