Өкмөт минералдык жер семирткичтерди экспорттоого убактылуу тыюу салды

Кыргызстандан ЕАЭБ аймагынын чегинен тышкары минералдык жер семирткичтерди алып чыгууга алты айлык мөөнөткө тыюу салынды.

Өкмөттөн билдиргендей, тиешелүү чечимге министрлер кабинетинин төрагасы Адылбек Касымалиев кол койду.

Бул чектөө экспорттолууга тийиш болгон, мурда үчүнчү өлкөлөрдөн импорттолгон жана сапатына карата белгиленген талаптарга ылайык келбеген минералдык жер семирткичтерге карата колдонулбайт.

Тиешелүү мамлекеттик органдарга минералдык жер семирткичтердин айрым түрлөрүн мыйзамсыз экспорттоого бөгөт коюуга багытталган зарыл чараларды көрүү тапшырылды.

Автор: Айжанар Рыспек кызы
Фото: интернеттен алынды