Караколдон тамак буюртма кылууну шылтоолоп, алдап акча алып жүрүүгө шектүү кармалды

Ысык-Көл облусунун Каракол шаарынан тамак буюртма кылууну шылтоолоп, алдамчылык кылууга шектүү кармалды. Бул тууралуу Ысык-Көл облустук милициясы кабарлады.

Маалыматка ылайык, өткөн жылдын 22-декабрында шаардык милиция бөлүмүнө Э.С. аттуу жаран арыз менен кайрылган. Анын айтымында, белгисиз жаран телефон аркылуу 6 порция тамакты Каракол шаарынын мэриясына жеткирип берүү боюнча буюртма берген. Арыз ээси буюртманы жөнөткөндөн кийин, шектүү телефон чалып 23 миң сомду картасына сала келүүнү суранган. Бирок шектүү картасына акча которулгандан кийин телефонун өчүрүп койгон.

Бир айдан кийин шаардык милицияга О.Э. аттуу жаран кайрадан эле ушундай бирдирүү менен арыз жазган. Анда шектүү тамак буюртма берип, 7500 сомду картасына салып коюну суранып, келгенде берерин айткан.

Фактылар боюнча иш козголуп, шектүү катары Сузак районунун 33 жаштагы Т.Х. аттуу тургуну Бишкек шаарынан 16-февралда кармалган. Алдын ала суракта шектүү күнөөсүн толугу менен мойнуна алып, Каракол шаардык соту тарабынан бир ай камакка алуу чечими чыккан.

Автор: Бурул Турусбекова