Даниэль Ажиевге карата СИЗОго камоо чарасы тандалды

Жакында колониядан бошотулган Даниэль Ажиев кайрадан кармалып, убактылуу кармоочу жайга киргизилди. Бул тууралуу маалыматты Чүй облустук ички иштер башкармалыгы тастыктады.

Маалыматка ылайык, Ажиевге Кылмыш-жаза кодексинин "Баңгизат каражаттарын, психотроптук заттарды жана алардын аналогдорун сатуу максатын көздөбөстөн мыйзамсыз даярдоо" беренеси боюнча айып тагылган. Алгач ал убактылуу кармоочу жайга киргизилген.

8-март күнү сот анын бөгөт чарасын карап чыгып, тергөө аяктаганга чейин СИЗО-1 мекемесине эки айга камоо тууралуу чечим чыгарды.

Эске салсак, Ажиев 2023-жылдын июнь айында вебкам-студияларды уюштурган деген айып менен кармалган. Ал Өзбекстан аркылуу Бириккен Араб Эмираттарына учуп кетүүгө аракет кылып жаткан учурда коңшу мамлекеттин аймагында кармалган. Соттун чечими менен Ажиев 9 жылга эркинен ажыратылган.

2026-жылдын 18-февралында ал президенттин жарлыгы менен мунапыс аркылуу бошотулганы тууралуу маалымат чыккан. Бирок 6-март күнү ал кайрадан Токмок шаарынан кармалган.

Автор: Максуда Кудайбердиева