Тарых илимин өнүктүрүү боюнча комиссиянын кеңешмеси өттү

Бүгүн, 25-мартта мамлекеттик катчы Арслан Койчиевдин төрагалыгы алдында тарых илимин өнүктүрүү боюнча комиссиянын кезектеги кеңешмеси өткөрүлдү. Бул тууралуу президенттик администрациядан билдиришти.

Маалым болгондой, кеңешменин жүрүшүндө улуттук тарых илимин өнүктүрүүгө багытталган бир катар маанилүү маселелер каралды.

"Кыргыз тарыхы боюнча 15 томдук фундаменталдык эмгектин долбоору талкууланып, жыйынтыгында аталган эмгектин структурасы жана мазмундук багыттары бекитилип, автордук жамааттын курамы аныкталды. Ошондой эле кол жазмаларды тапшыруу мөөнөтү белгиленди. Анын алкагында маданий мурастарды даңазалоо жана коомчулукка жеткирүү маселелери да өзгөчө көңүл борборунда болду. Бишкек шаарынын аймагында байыркы кыргыз жазууларын чагылдырган инсталляциялык комплексти түзүү демилгеси каралып, тиешелүү мамлекеттик органдарга тапшырма берилди",- деп белгиленген маалыматта.

Автор: Замира Ниязбекова