Трамп АКШ менен келишимге барбаса, Иранга “тозок уюштурууну” убада кылды

АКШ президенти Дональд Трамп Жакынкы Чыгыштагы жаңжалды жөнгө салуу боюнча келишимге макул болбосо, Иранга карата катуу чара көрүүгө даяр экенин билдирди. Бул тууралуу Ак үйдүн өкүлү Кэролайн Левитт брифинг учурунда маалымдады.

Анын айтымында, эгер Иран кырдаалды туура баалабай, жеңилгенин түшүнбөсө, анда Трамп мурда болуп көрбөгөндөй күчтүү сокку урууну карайт. Левитт ошондой эле АКШ президенти бул маселеде олуттуу экенин баса белгиледи.

Ошол эле учурда ал АКШ менен Иран ортосунда сүйлөшүүлөр улантылып жатканын айтты. Анын сөзүнө караганда, сүйлөшүүлөр натыйжалуу жүрүүдө. Ошондой эле ал АКШ сунуштаган 15 пункттан турган план тууралуу маалыматтардын айрымдары чындыкка жакын экенин кошумчалады.

Өз кезегинде Ирандын тышкы иштер министри Аббас Аракчи АКШнын сунуштары каралып жатканын, бирок ортомчулар аркылуу билдирүү алмашуу түз сүйлөшүү дегенди билдирбей турганын айтты. Ал Иран согушту өз шарттары менен аяктоону көздөп, каршылыгын улантарын белгиледи.

Ошондой эле Иран парламентинин спикери Мохаммад-Багер Галибаф өлкөнүн атайын кызматтары душмандар Перс булуңундагы аралдардын бирин басып алууга даярданып жатканын маалымдаганын билдирди. Анын айтымында, мындай учурда аталган өлкөнүн маанилүү инфраструктурасы тынымсыз чабуулдардын бутасына айланат.

Автор: Максуда Кудайбердиева