Ырчы Эмил Балтагулов жаңы кызматка дайындалды

Белгилүү ырчы Эмил Балтагулов Жалал-Абад облустук филармониясынын директору болуп дайындалды.

Маданият министрлиги билдиргендей, ырчы аталган кызмат ордуна 3 айлык сыноо мөөнөтү менен дайындалган.

Эмил Балтагулов 1981-жылдын 28-сентябрында Жалал-Абад облусунун Чаткал районундагы Терек-Сай шаарчасында төрөлгөн. 2004-жылы Ош мамлекеттик университетинин искусство факультетинин музыка бөлүмүн артыкчылык диплому менен аяктаган.

Ал Ош мамлекеттик университетинде окутуучу болуп эмгектенген, Чаткал районундагы маданият үйүндө көркөм жетекчи, Жалал-Абад облустук филармониясында артист жана директордун орун басары болуп иштеген. Ошондой эле Жалал-Абад маданият техникумунун жана Барпы атындагы облустук кыргыз драма театрынын директору кызматтарын аркалаган. 2022-2024-жылдары Токтосун Тыныбеков атындагы Жалал-Абад облустук филармониясынын директору болуп иштеген.

Ал бир катар эл аралык жана республикалык сынактардын лауреаты. Анын ичинде "Улуттар аралык классика-2004" фестивалынын лауреаты, "Мыкты аткаруучу-2000" сынагынын байге ээси, ошондой эле Рыспай Абдыкадыров атындагы ырчылар сынагынын жеңүүчүсү.

Маданият, маалымат жана жаштар саясаты министрлигинин Ардак грамотасы жана “Маданияттын мыкты кызматкери” төш белгиси менен сыйланган.

Автор: Айжанар Рыспек кызы