Чуңкурчак эс алуу жайында түлкү атылган окуя боюнча текшерүү башталды (видео)

Чүй облусунда жапайы жаныбарга ок чыгаруу фактысы боюнча териштирүү жүрүүдө. Бул тууралуу облустук милиция билдирди.

Маалым болгондой, 31-мартта Фейсбук социалдык тармагында белгисиз адамдардын тоо жакта унаанын жарыгы менен жапайы жаныбарларды көздөй ок чыгарып жаткан видеосу жарыяланган. Бул фактынын негизинде маалымат Аламүдүн райондук ички иштер бөлүмүндө каттоого алынып, текшерүү иштери башталган.

Натыйжада окуяга тиешеси бар 2001-жылы туулган Т.Ж., К.Э. жана 2003-жылы туулган К.Т. аттуу жарандар аныкталды.

Тергөөнүн маалыматы боюнча, алар 26-мартта Чуңкурчак эс алуу жайына барып, шишкебек даярдап эс алып жатышкан. Ошол учурда аларга жапайы түлкү жакындап келип, алардын тамак-ашын жей баштаган. Андан кийин алардын бири пневматикалык куралдан түлкүнү көздөй ок чыгарган. Бул окуяны өздөрү тартып, интернет желесине жарялаган.

Ошондой эле пневматикалык курал алардын таанышына таандык экени, ал эми алар аны эс алуу учурунда бөтөлкөлөрдү атуу үчүн алып чыгышканы аныкталды.

Бул факт боюнча соттук-баллистикалык экспертиза дайындалып, териштирүү иштери улантылууда.