Экинчи дүйнөлүк согуштун ардагерлерине 200 миң сомдон берилет

Президент Садыр Жапаров Улуу Ата Мекендик согуштун ардагерлерине бир жолку материалдык жардам берүү тууралуу тескемеге кол койду.

Документке ылайык, ар бир ардагерге 200 миң сом өлчөмүндө бир жолку жардам көрсөтүлөт. Бул максатта президенттин фондунан жалпы 4 миллион 848 миң сом бөлүнүп, каражат Эмгек, социалдык камсыздоо жана миграция министрлиги аркылуу төлөнөт.

Жардам төмөнкү категориядагы жарандарга берилет:

• Улуу Ата Мекендик согуштун катышуучулары

• Экинчи дүйнөлүк согуш маалында концлагерлерде, геттолордо жана башка мажбурлап кармоо жайларында жашы жете элек туткун болгон адамдар

• Ленинград блокадасы учурунда (1941-жылдын 8-сентябрынан 1944-жылдын 27-январына чейин) иштеген жана тиешелүү сыйлыктар менен сыйланган жарандар

Бул чечим согуш ардагерлерине мамлекеттик колдоону күчөтүү жана алардын эмгегин баалоо максатын көздөйт.

Автор: Айзада Кыдырмышева