Бишкекте документи жок дары-дармекти мыйзамсыз сатуу фактысы аныкталды

Бишкек шаарында фармацевтикалык продукцияларды мыйзамсыз сатууга жана сактоого бөгөт коюлду. Бул тууралуу 22-апрелде Салык кызматынан билдиришти.

Маалыматка ылайык, рейддик иш-чаралардын жүрүшүндө лицензиясы жана тиешелүү коштомо документтери жок дары-дармектер сатылып жаткан контейнер табылган. Андан ар түрдүү аталыштагы 7 миң 64 даана дары-дармек каражаттары жана 160 флакон этил спирти аныкталган.

Учурда чогултулган материалдар дары-дармек каражаттарын жана медициналык буюмдарды жүгүртүү тармагындагы ыйгарым укуктуу мамлекеттик органга өткөрүлүп берилди.

Автор: Меерим Кабылова