Депутат Орусиядагы кыргыз дарыгерлерин өлкөгө чакыруу зарылдыгын айтты

Орусияда иштеп жаткан кыргызстандык медицина кызматкерлерин өлкөгө чакыруу зарыл. Бул тууралуу Жогорку Кеңештин депутаты Талаайбек Сарыбашов парламенттин бүгүнкү жыйынында айтты.

Эл өкүлү саламаттык сактоо министри Москва шаарында мигрант дарыгерлер менен баарлашуу уюштурушу зарыл деп эсептейт.

Айтымында, медицина кызматкерлерин өлкөгө кайтаруу менен аймактардагы кадр жетишсиздиги чечилмек.

"Тоолуу аймактарда дарыгерлер жетишсиз. Бүгүнкү күндө ал жакта Кыргызстандан барган 5 миңге жакын медицина кызматкерлери иштеп жүрөт. Албетте, ал жакта айлык акылар көп.

Жаңы дайындалган саламаттык сактоо министрине Москва шаарына барып, семинар уюштуруп, алар менен жолугуп, маяна, шарттар тууралуу баарлашуу уюштурууну сунуштайт элем. Ошол беш миңге жакын дарыгердин 5-10 пайызы келсе деле чоң пайда болот эле", - деди депутат.

Автор: Айжанар Рыспек кызы
Фото: интернеттен алынды